2015 оны 06 сарын 02 өдөр                                                                         дугаар А/471                                                     Улаанбаатар хот

Журам шинэчлэн батлах тухай

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 29 дүгээр зүйлийн 29.2, Хот тосгоны эрх зүйн байдлын тухай хуулийн 20 дугаар зүйлийн 20.1, Орон сууцны тухай хуулийн 8 дугаар зүйлийн 8.2.2 дахь заалт, Нийслэлийн иргэдийн Төлөөлөгчдийн Хурлын 2014 оны “Нийслэлийн орон сууцны” хөтөлбөр батлах тухай 17/17 дугаар тогтоолыг тус тус үндэслэн ЗАХИРАМЖЛАХ нь:

1.“Ахмадын орон сууц” хөтөлбөрт хамрагдах иргэдийг сонгон шалгаруулах журмыг нэгдүгээр хавсралтаар, “Ахмадын орон сууц” хөтөлбөрт хамрагдах иргэдийн нэрсийг сугалаагаар тодруулах журмыг хоёрдугаар хавсралтаар баталсугай.

2.“Ахмадын орон сууц” хөтөлбөрт хамрагдах иргэдийг сонгон шалгаруулах ажлыг журмын дагуу зохион байгуулахыг дүүргүүдийн Засаг даргын Тамгын газарт даалгасугай.

3.Энэ захирамж гарсантай холбогдуулан Нийслэлийн Засаг даргын 2013 оны А/720 дугаар захирамжийн нэг, хоёрдугаар хавсралтыг хүчингүй болсонд тооцсугай.

4.“Ахмадын орон сууц” хөтөлбөрт хамрагдахаар 2013-2015 оны хооронд Улаанбаатар хотын Захирагчийн ажлын албанд хүсэлт гаргасан иргэдийн материалыг харьяа дүүргүүдэд нь хүлээлгэн өгөх, Захирамжийн биелэлтэд хяналт тавьж ажиллахыг Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадралд үүрэг болгосугай.

НИЙСЛЭЛИЙН ЗАСАГ ДАРГА
БӨГӨӨД УЛААНБААТАР
ХОТЫН ЗАХИРАГЧ                                                                Э.БАТ-ҮҮЛ

Нийслэлийн  Засаг  даргын  2015 оны

                                                                           6 дугаар сарын 02-ны өдрийн

                                                                          А/471 дүгээр захирамжийн  1 дүгээр хавсралт

 

 “АХМАДЫН ОРОН СУУЦ” ХӨТӨЛБӨРТ ХАМРАГДАХ

ИРГЭДИЙГ СОНГОН ШАЛГАРУУЛАХ

ШИНЭЧИЛСЭН ЖУРАМ

 

 

Нэг. Нийтлэг үндэслэл

 

1.1.Нийслэлийн иргэдийн Төлөөлөгчдийн Хурлын 2014 оны 17/17 дугаар тогтоолоор батлагдсан “Ахмадын орон сууц” хөтөлбөрт хамрагдах иргэдийн харилцааг энэхүү  журмаар зохицуулна.

 

1.2.Журмыг хэрэгжүүлэхдээ хууль дээдлэх, шударга, ил тод байх, адил тэгш хандах зарчим баримтална.

 

Хоёр. Хөтөлбөрт хамрагдах иргэдэд  тавигдах шалгуур

 

2.1.“Ахмадын орон сууц” хөтөлбөрт хамрагдах иргэд дараах шалгууруудыг хангасан байна. Үүнд:

 

2.1.1.Улсаас орон сууц авч байгаагүй;

 

2.1.2.Улаанбаатар хотын харьяат ба сүүлийн 10 жил хотод амьдарсан байх;

 

2.1.3.Өрхийн орлого нь ашиглалтын болон орон сууц хөлслөх зардлаа төлөх чадвартай байх;

 

2.1.4.Нийтийн эзэмшлийн эд хөрөнгийн бүрэн бүтэн байдал, элэгдлийн санг тооцсон 3 сарын хөлсийг болон ашиглалтын зардалтай тэнцэхүйц хэмжээний барьцааг төлөх чадвартай байх;

 

2.1.5.Өндөр насны тэтгэвэр тогтоолгосон 60 ба түүнээс дээш насны эрэгтэй, 55 ба түүнээс дээш насны эмэгтэй Монгол улсын иргэн байх;

 

2.1.6.Өөрийн өмчлөлийн байшин болон автомашингүй байх;

 

2.1.7.Нөхцөл байдлын үнэлгээг тухайн иргэн өөрийн оршин суугаа дүүрэг хорооны Нийгмийн халамж үйлчилгээний хэлтсийн ажилтнаар хийлгэж тодорхойлуулсан байх, шаардлагатай бол дүүргийн цагдаагийн хэлтэс, хорооны хэв журмын байцаагчаас тодорхойлолт авах.

 

2.1.8.Хөтөлбөр батлагдсан өдрөөс хойш өмчлөлийн эд хөрөнгөө бусдад шилжүүлээгүй байх:

 

 

2.2.Гачигдалтай, хөгжлийн бэрхшээлтэй иргэнд журмын 2.1.5 дахь заалт хамаарахгүй

 

2.3.Байгалийн гамшиг, үер ус, гал түймрийн гэнэтийн аюулд өртөж амь нас, эрүүл мэндээр хохирсон, орон гэргүй болсон гачигдалтай иргэдийг Нийслэлийн Засаг даргын шийдвэрээр хөтөлбөрт хамруулна.

 

Гурав.Хөтөлбөрт хамрагдах иргэдийн бүрдүүлэх материал

 

3.0.Хөтөлбөрт хамрагдах иргэд нь дараах бичиг баримтыг бүрдүүлнэ.

 

3.1.Ахмад настан:

 

3.1.1.Иргэний цахим үнэмлэхний хуулбар

 

3.1.2.Өргөдөл (Өргөдлийг Маягт АОС-1-ийн дагуу гаргана)

 

3.1.3.Өрхийн орлогоо тодорхойлсон баримт (тэтгэврийн дэвтрийн  хуулбар, хөлс төлөх батлан даагчийн орлого, өргөдөл, батлан даагчийн цахим үнэмлэхний хуулбар)

3.1.4.Улсаас орон сууц авч байсан эсэх лавлагаа (Эхнэр нөхөр тус бүр)

 

3.1.5 Өмчлөлд нь эд хөрөнгө бүртгэлтэй эсэх лавлагаа (Эхнэр нөхөр тус бүр)

 

3.1.6.Энэ журмын 2.1-д заасан шалгууруудыг хангасан байх.

 

3.2. Гачигдалтай, хөгжлийн бэрхшээлтэй иргэн:

 

3.2.1.Иргэний цахим үнэмлэхний хуулбар,

 

3.2.2.Өргөдөл.  (Өргөдлийг Маягт АОС-2-ын дагуу гаргана)

 

3.2.3.Өрхийн орлогоо тодорхойлсон баримт, (тэтгэврийн дэвтрийн  хуулбар, ажил эрхэлдэг бол байгууллагын болон цалингийн тодорхойлолт, хөлс төлөх батлан даагчийн орлого, өргөдөл, иргэний үнэмлэхний хуулбар)

 

3.2.4.Улсаас орон сууц авч байсан эсэх лавлагаа, (Эхнэр, нөхөр тус бүр)

 

3.2.5. Өмчлөлд нь эд хөрөнгө бүртгэлтэй эсэх лавлагаа, (Эхнэр, нөхөр тус бүр)

 

3.2.6.Гачигдалтай иргэн бол Гамшгаас хамгаалах төрийн захиргааны байгууллагын дүгнэлт, акт, тухайн  дүүргийн тодорхойлолт,

 

3.2.7.Хөгжлийн бэрхшээлтэй иргэн бол группын дэвтэр, Хөдөлмөрийн чадвар алдалтын хувь тогтоосон акт,

 

3.3. Цахим үнэмлэхний хуулбар

 

3.3.1.Төрийн албан хаагч өргөдлөө маягт АОС-2-ын дагуу гаргасан байх,

3.3.2. Энэ журмын заасан шалгууруудын 2.1.5-с бусдыг нь хангасан байх.

 

Дөрөв. Хөтөлбөрт хамрагдах  иргэдийг  сонгох

 

4.1.”Ахмадын орон сууц” хөтөлбөрт хамрагдах иргэдийг сонгохдоо Улаанбаатар хотын Захирагчийн ажлын албанд болон дүүрэг, хороонд ирүүлсэн өргөдлийн дарааллыг баримтлана.

 

4.2.Журмын 2.1-т заасан шаардлагыг хангасан болон журмын 3 дугаар хэсэгт заасан материалыг бүрдүүлсэн иргэн харьяа дүүрэг болон хорооны нэг цэгийн үйлчилгээнд өргөдлөө гаргана.

 

4.3.Захирагчийн ажлын албанд 1995 оноос 2012 оны хооронд орон сууц хүссэн өргөдөл өгсөн иргэд журмын шаардлага хангасан тохиолдолд тухайн он дарааллаар эхний ээлжинд түрээсийн орон сууцанд хамрагдана.

 

4.4.Улаанбаатар хотын Захирагчийн ажлын албанд 2013-2014 онд ирсэн өргөдөл материалыг дүүрэг тус бүрт нь дарааллын дагуу хүлээлгэн өгнө.

 

4.5.Дүүрэг нь иргэдийн өргөдөл өгсөн хугацааг нарийвчлан гаргаж дарааллын дагуу ”Ахмадын орон сууц” хөтөлбөрт хамрагдах болзол, шалгуурыг хангасан түрээсийн орон сууцанд орох хүсэлтээ гаргасан иргэдийн материалыг нягтлан судална.

 

4.6.Ижил нөхцөл байдалтай иргэдийн асуудлыг сугалаагаар тодруулах журмаар сонгон шийдвэрлэнэ.

 

            Тав. Орон сууцны хуваарилалт

 

5.1.Тухайн дүүргийн хүн амын нягтаршил, ашиглалтад орсон түрээсийн орон сууцны байршил зэргийг харгалзан Улаанбаатар хотын Захирагчийн ажлын алба дүүрэг тус бүрт ногдох байрны хуваарилалтыг хийнэ.

 

5.2.Дүүрэг нь түрээсийн орон сууцыг өргөдөл материалын дагуу хуваарилахдаа:

 

-Ахмад настанд 75%

-Хөгжлийн бэрхшээлтэй иргэдэд 20%

-Гачигдалтай иргэдэд 5% олгох харьцааг баримтална.

 

            Зургаа. Комиссын хурал зохион байгуулалт, шийдвэр гаргалт

 

6.1.Дүүрэг тус бүр “Ахмадын орон сууц” хөтөлбөрт хамрагдах иргэдийг “Сонгон шалгаруулах комисс”-той байна. /Комиссын бүрэлдэхүүнд хөгжлийн бэрхшээлтэй иргэдийн эрх ашгийг хамгаалах чиглэлээр үйл ажиллагаа явуулдаг төрийн бус байгууллагын төлөөллийг оруулах./

 

6.2.Ажлын хэсэг болон хяналтын комиссыг тухайн дүүргийн Засаг даргын захирамжаар томилно.

 

6.3.Дүүргүүдийн “Сонгон шалгаруулах комисс” /Цаашид комисс гэх/ шаардлага хангасан материалтай танилцан шийдвэр гаргана.

 

6.4.Комисс нь сонгогдсон иргэдийн орон сууцны хувиарлалтыг иргэн тус бүрээр нь хийж Улаанбаатар хотын Захирагчийн ажлын албанд хүргүүлнэ.

 

6.5.Комиссын шийдвэр, хурлын тэмдэглэлийг үндэслэн орон сууц түрээслэх эрхийн бичгийг дүүргийн засаг дарга албажуулна.

 

6.6.Комисс нь гарсан шийдвэр, хөтөлбөрт хамрагдсан иргэдийн нэрсийг “Хотхоны захиргаа”-нд хүлээлгэж өгнө.

 

6.7.Хотхоны захиргаанаас сул байрны мэдээллийг тухай бүр нь Улаанбаатар хотын Захирагчийн ажлын албанд бичгээр хүргүүлнэ.

 

6.8.Суларсан орон сууцанд өмнө нь харьяалагдаж байсан дүүргээс нь шаардлага хангасан иргэдийг нөхөн оруулна.

 

6.9.Комисс нь Ажлын хэсэгтэй байж болно,

 

6.10.Комисс, комиссийн гишүүд нь аливаа нөлөөлөлд автахгүй хараат бусаар шийдвэр гаргана.

 

Долоо. Бусад зүйл

 

7.1.Орон сууц хөлслөх, хөлслүүлэхтэй холбоотой харилцааг “Ахмадын орон сууц” тусгай нөхцөлтэйгөөр түрээслүүлэх гэрээ”-ээр зохицуулна.

 

7.2.Орон сууц түрээслэх гэрээг хотхоны захиргаа иргэдтэй байгуулна.

 

Нийслэлийн  Засаг  даргын  2015 оны

                                                                                          6 дугаар сарын 02-ны өдрийн

                                                                          А/471 дүгээр захирамжийн  2 дугаар хавсралт

 

 

 

“АХМАДЫН ОРОН СУУЦ” ХӨТӨЛБӨРТ ХАМРАГДАХ

ИРГЭДИЙН НЭРСИЙГ СУГАЛААГААР

ТОДРУУЛАХ ЖУРАМ

            Нэг. Нийтлэг үндэслэл

 

1.1 Нийслэлийн иргэдийн Төлөөлөгчдийн Хурлын 2014 оны 17/17 дугаар тогтоолоор батлагдсан “Ахмадын орон сууц” хөтөлбөрт хамрагдах иргэнийг сугалаагаар /оноолтоор/ тодруулахтай холбогдсон харилцааг  энэхүү журмаар зохицуулна.

 

1.2 Сугалааг шударга, нээлттэй, ил тод, гар аргаар, хөндлөнгийн хяналтан дор явуулна.

 

1.3 Сугалаанд хөтөлбөрт хамрагдахаар хүсэлт гаргасан “Ахмадын орон сууц” хөтөлбөрт хамрагдах журамд заасан шалгуурыг хангасан иргэнийг оролцуулна.

 

Хоёр. Сугалаа зохион байгуулах

 

2.1 Хөтөлбөрт хамрагдах иргэдийг сугалаагаар тодруулах ажиллагаа нь дараах үе шаттай байна.

 

2.1.1. Сугалаа зохион байгуулахад бэлтгэх;

2.1.2. Сугалаа зохион байгуулж, иргэдийг шалгаруулах.

 

2.2 Сугалааг зохион байгуулах ажлыг сонгон шалгаруулах комиссын ажлын хэсэг зохион байгуулж, зохион байгуулах үйл ажиллагаанд сонгон шалгаруулах комисс хяналт тавьж ажиллана.

 

2.3 Сугалааг хэзээ, хаана зохион байгуулахыг сонгон шалгаруулах комисс хуралдаж шийдвэрлэнэ.

 

2.4 Сугалаа явагдаж дууссаны дараа сонгон шалгаруулах комисс нь ажлын тайланг Засаг даргын зөвлөлд тайлагнана.

 

2.5 Сугалаанд хожсон иргэдийн мэдээллийг цахим хуудас болон хэвлэл мэдээлэл, олон нийтийн хэрэгслээр нийтэд мэдээлнэ.

 

Гурав. Ажлын хэсэг, түүний эрх, үүрэг

 

3.1 Ажлын хэсгийн ахлагч нь ажлын хэсгийн ажлыг удирдан зохион байгуулж, чиг үүргээр хангаж ажиллана.

 

3.2 Ажлын хэсгийн нарийн бичгийн дарга нь ажлын хэсгийн гишүүдийн ажлын уялдаа холбоог хангах, Ажлын хэсгийн хурлаас гарсан шийдвэрийг албажуулах, сугалааг зохион байгуулах ажлын хүрээнд өөрт даалгасан үүрэг даалгаврыг биелүүлж ажиллана.

 

3.3 Нарийн бичгийн дарга нь сугалаа явуулах бэлтгэл ажлыг хангах, сугалааны үйл ажиллагааг зохион байгуулах, сугалаатай холбоотой иргэдийн гаргасан гомдол, санал хүсэлтийг хүлээн авч, Ажлын хэсгийн ахлагч болон ажлын хэсгийн хурлаар танилцуулж шийдвэрлүүлэх ажиллагааг хэрэгжүүлнэ.

 

3.4 Ажлын хэсгийн гишүүд нь сугалааны үйл ажиллагааг зохион байгуулах ажиллагаанд ахлагч, нарийн бичгээс өгсөн үүрэг даалгаврыг хэрэгжүүлнэ.

 

3.5 Ажлын хэсэг нь сугалаатай холбоотой мэдээллийг холбогдох эрх бүхий албан тушаалтны зөвшөөрөлгүйгээр задруулахыг хориглоно.

 

3.6 Ажлын хэсэг нь захирамжаар байгуулагдсан өдрөөс эхлэн үйл ажиллагаагаа  эхлүүлж, сугалааг зохион байгуулж дуусан, ажлын тайланг Засаг даргын зөвлөлийн хурлаар хэлэлцүүлснээр татан буугдана.

 

Дөрөв. Сугалаа зохион байгуулахад бэлтгэх

 

4.1 Ажлын хэсэг сугалааг зохион байгуулахад шаардлагатай дараах зүйлсийг сугалаа зохион байгуулахаас нэг хоногийн өмнө бэлдсэн байна.

 

4.1.1 Тэмдгэн дардас;

4.1.2 Сугалаа;

4.1.3 Сугалааны хүрд;

4.1.4 Сугалаа явуулах байр;

4.1.5 Бусад

 

4.2 Тэмдгэн дардас нь 2,0 х 4,0 см хэмжээтэй, баруун доод булан тэмдгийн дугаартай, СУГАЛАА гэсэн бичиглэлтэй байна. Түүнийг тамга тэмдгийн үйлдвэрт ганц хувь захиалан хийлгэнэ.

 

4.3 Сугалаа нь 4,8 х 3,0 см хэмжээтэй байх бөгөөд дундуураа таслах шугамтайгаар 2 хувь хэвлүүлэн, хөндлөнгөөр дамнуулан тэмдгэн дардас дарж баталгаажуулан бэлтгэнэ. Эхний хувийг тасалж, Ажлын хэсгийн хяналтан доор хуйлж, тусгайлан бэлдсэн хайрцганд хийж, лацаар битүүмжлэн, сугалааг явуулах өдөр хүртэл хадгалах бөгөөд үлдэх хувийг хяналтын хувь болгож хадгална.

 

4.4 Сугалааны код нь иргэний Ахмадын орон сууц хөтөлбөрт хамрагдахаар өгсөн хүсэлтийг “Өргөдөл гомдлын нэгдсэн програм”-д бүртгэсэн  бүртгэлийн дугаар байна.Сугалааг явуулахад шаардлагатай сугалааны хүрд бэлтгэнэ.

 

4.5 Сугалааны хүрд нь тунгалаг өнгөтэй, гаднаасаа харагдахуйц материалаар цоожлох боломжтойгоор хийгдсэн байна.

 

4.6 Ажлын хэсэг сугалаа явуулах байрыг сугалаа явуулахаас 1-ээс доошгүй хоногийн өмнө бэлэн болгоно. Зааланд сугалааны хүрд, сонгон шалгаруулах комиссын  гишүүдийн  суух  ширээ  сандал,  сугалаанд  хожигчийн  нэрийг  гаргах

телевизор, компьютер, принтер гэх мэт шаардлагатай зүйлсийг байрлуулан бэлтгэл ажлыг хангасан байна.

 

4.7 Ажлын хэсэг нь орон сууцанд орох эрх авсан иргэдийн мэдээллийг бичих хүснэгт, мэдээллийг нээлттэй харуулах дэлгэц зэрэг бусад шаардлагатай зүйлсийг тусгайлан бэлтгэнэ.

 

4.8 Журмын шаардлага хангаж сугалаанд оролцох нөхцлийг хангасан иргэдийн нэрсийн жагсаалтыг нэгтгэн гаргаж, сугалаа явагдахаас 5-аас доошгүй хоногийн өмнө дүүргийн цахим хуудас болон хэвлэл мэдээлэл, олон нийтийн хэрэгслээр нийтэд мэдээлнэ.

 

4.9 Сугалаа явуулахад дараах этгээдийг байлцуулах бөгөөд сугалаа явагдахаас 1 цаг 30 минутын өмнө сугалаа явуулах байранд ирүүлсэн байна.

 

4.9.1 Хүүхэд;

4.9.2 Хөтлөгч;

4.9.3 Туслах ажилтан

 

4.10 Сугалааг хүрднээс 6-10 насны хүүхдээр сугалуулах бөгөөд нийт 5 хүүхдийг асран хамгаалагчтай нь урьдчилан зөвшөөрөл авч тохиролцон бэлтгэнэ. Ажлын хэсгээс хүүхдүүдэд сугалааг хэрхэн сугалах талаар зааварчилгаа өгнө.

 

4.11 Ажлын хэсэг нь сугалааны хүрдийг эргүүлэх, онгойлгож өгөх, буцаан цоожлох үүрэг бүхий 4 ажилтныг сугалаа явуулахаас 1-ээс доошгүй хоногийн өмнө сонгож, хувцаслалт, гүйцэтгэх ажил үүргийн талаар зааварчилгаа өгсөн байна.

 

4.12 Сугалаа явагдах өдрүүдэд, сугалаа явагдахаас 3-аас доошгүй цагийн өмнө ажлын хэсгийн гишүүд, холбогдох бусад ажилтан битүүмжлэн хадгалсан, сугалаатай хайрцгийг сонгон шалгаруулах комиссоос томилогдсон гишүүний хяналтан доор сугалаа явагдах газарт байрлуулна.

 

Тав. Сугалаа зохион байгуулж, “Ахмадын орон сууц” хөтөлбөрт хамрагдах иргэдийг шалгаруулах

 

5.1. Сугалааг явуулахдаа сугалаанд оролцох эрх авсан ахмад настнуудын дунд орон сууц тус бүрээр явуулна.

 

5.2. Сугалаа сугалагч 5 хүүхэд ээлж, ээлжээр хүрднээс сугалааг сугалж, хүрдний хажууд сугалаагаа дээш өргөн барьж зогсоно.

 

5.3. Хөтлөгч хүүхдээс сугалааг авч, сугалаа хожигчийн бүртгэлийн дугаарыг зарлан, сугалааг хүүхдэд буцааж өгөх бөгөөд хүүхэд сугалааг Сонгон шалгаруулах комисст аваачиж өгнө.

 

5.4. Сонгон шалгаруулах комиссын нарийн бичгийн дарга нь сугалааны дугаарыг бусад гишүүдэд үзүүлэн хянуулж, тусгайлан бэлтгэсэн хүснэгтэд дугаарыг бичиж, арын зайнд нь сугалааг наана.

 

5.5. Сугалааг орон сууц тус бүрээр сугалж дууссаны дараа Ажлын хэсгээс томилогдсон ажилтнууд хүрдэнд үлдсэн сугалааг Сонгон шалгаруулах комиссын

гишүүдийн хяналтан доор анх сугалааг хадгалж байсан хайрцагт буцаан хийж, лацдана.

 

5.6. Ажлын хэсгийн гишүүн, дүүргийн технологийн мэргэжилтэн орон сууц худалдан авах эрх авсан иргэдийн овог нэр, регистрийн дугаарыг тусгайлан бэлтгэсэн дэлгэцээр гаргана.

 

5.7. Сугалааг хуйлах, хайрцагт хийх ажиллагааны явцыг Ажлын хэсэг хянаж, фото зураг болон видео хэлбэрээр баталгаажуулах ба Ажлын хэсгийн нарийн бичгийн дарга бичгээр протокол үйлдэн, Ажлын хэсгийн ахлагч, гишүүд гарын үсгээр баталгаажуулна.

 

5.8. Сугалааг Сонгон шалгаруулах комиссын бүрэлдэхүүнийг байлцуулан явуулна.

 

Зургаа. Сугалааны үйл ажиллагаанд тавих хяналт

 

6.1. Сонгон шалгаруулах комисс нь сугалаа зохион байгуулах бүхий л үйл ажиллагаанд хяналт тавих бөгөөд сугалаа зохион байгуулах үед дараах хяналтыг тавина. Үүнд:

 

6.1.1 Сугалааг хуйлж хийсэн хайрцагийн битүүмжлэлийг шалгах;

6.1.2 Битүүмжилсэн хайрцагнаас сугалааг хүрдэнд бүрэн хийсэн эсэх;

6.1.3 Хүүхдийн сугалсан сугалааг хөтлөгч үнэн зөв зарласан эсэх;

 

6.2 Комиссын гишүүд шаардлагатай гэж үзвэл сугалаа явагдаж дууссаны дараа хүрдэнд үлдсэн сугалааны тоо байх ёстой тоондоо байгаа эсэхийг хянаж, хяналтын тооллого явуулж болно.

 

6.3 Комиссын нарийн бичгийн дарга сугалааны үйл явцын талаар тэмдэглэл хөтөлж, гишүүдээр гарын үсэг зуруулж баталгаажуулна.

 

6.4 Сугалаа зохион байгуулах ажлын явцад урьдчилан төлөвлөөгүй гэнэтийн, энэхүү журмаар зохицуулаагүй асуудал гарвал Комиссын гишүүд, шаардлагатай бол Ажлын хэсэг газар дээр нь хэлэлцэж шийдвэрлэнэ.